ليه بنحرك ادينا واحنا ماشيين؟

ليه بنحرك ادينا واحنا ماشيين؟

يوم مُمل جدًا وإنت قاعد في الشغل أو في مُحاضرة 9 الصُبح والجو حَر ، وحاطِط إيدك على خدك ومش لاقي حاجة تعملها . 😃

 

وعمال تتأمل بـ عُمق في الحاجات اللي حواليك وتبُص على الناس اللي رايحة واللي جاية .

 

وإذا فجأةًا تِظهر فِكرة عابثة في دماغك ،

( ليه الناس اللي ماشية دي بتحرك إيديها كده ؟! )

ليه مُضطرين يهزوا في إيدهم طول ماهُمَ ماشيين !

هُم بيمشوا بـ إيدهُم ولا بـ رجليهم .. 😐

 

وعشان تِثبت وجهِة نظرك العظيمة ، فَـ بتقوم من مكانك وتبدأ تمشي كام خطوة ، وتحاول بكل فَخر إنك تِثَبِّت إيدك جانبك وإنتَ ماشي وما تحركهاش خالص 😃 .. والغريب إنك بتكتشف إن الموضوع نجح .

 

وتبدأ تتسائل مرة تانية طلما مُمكن أمشي من غير ما أحرك إيدي ، ليه بحركها ؟!

 

- وعلى أصوات الموسيقى الحماسية بتاخد فورًا قرار مصيري بإنك مِش هتحرك إيدك تاني أبدًا أثناء المشي .

.

.

# المُهم إنه بعدها بشوية وبعد ما بتنسى الموضوع .. وتبدأ تفكر هَتجيب إيه تاكله ، فبتلاقي نفسك أثناء طريقك للمطعم بتحرك إيدك تاني برده وإنتَ ماشي .. 😃

..

..

أهلاً بيكُم . 

..

.

.

 

ليه بنحرك إيدنا أثناء المشي ؟

 

لفترة كبيرة من الزمن كُنا مُعتقدين إن حركة إيدنا دي أثناء المشي ماهي إلا حَركة روتينية مالهاش أي لازمة .. 

 

وإنها مثلا بتنتج بسبب إنه أثناء ما بنحرك رجلينا بسرعة ، فَـ جِسمنا كُله بيتهز ، وبالتالي بتفضل إيدنا تتمرجح يمين وشمال بسبب الهزات دي .

.

.

# لكن في الواقع الكلام ده مش صَح ..

حركة الإيد أثناء المشي مش بسبب إن جسمك بيتهز ولا حاجة ، ولا بسبب إن رجلك هي المسؤلة عن الحركة دي ،

 

ولكن عقلك اللاإرادي بيحركها بهدف مُعين .

 

بل ده أنا كمان هقول جُملة غريبة جدًا (حركة إيدك أثناء المشي بتساعد رجلك إنها تمشي!)

.

.

 

ولو مُعتقد إن حركة الإيد أثناء المشي مالهاش لازمة ، فدي تجربة إتعملت في جامعة (مِيشيجان) سنة 2009 على مجموعة من الأشخاص .

 

حيثُ إن القائمين على التجربة طلبوا منهُم إنهم يجربوا يمشوا بـ طُرق مُعينة ،

- ومُمكن تجرب التجربة دي مع نفسك ..

 

1) أولاً طلبوا منهم إنهُم يمشوا بالطريقة العادية ، واللي هي إن الإيد اليمين تتحرك مع القدم الشمال ، والإيد الشمال تتحرك مع القدم اليمين أثناء المشي .

 

وحسبوا كمية الطاقة اللي إستهلكها الأشخاص دول أثناء المشي بالطريقة دي .

.

.

 

2) وبعدين طلبوا منهم إنهم يِثَبِّتوا إيدهم جانبهم وما يحركوهاش ، ولفوا حبل حوالين إيدهم وجسمهم (زي الصورة الموجودة تحت في الكومنتات) .. وطلبوا منهم إنهم يحاولوا يمشوا .

 

وحسبوا كمية الطاقة اللي إستهلكها الأشخاص دول أثناء المشي بالطريقة دي . 

 

.

.

 

3) وأخيرًا فكوهم ، وطلبوا منهم إنهم يعكسوا الإتجاهات الإعتيادية لحركة الإيد أثناء المشي .. يعني يحركوا إيدهم اليمين مع القدم اليمين ، ويحركوا الإيد الشمال مع القدم الشمال .. ويحاولوا يمشوا ..

 

وبرده حسبوا كمية الطاقة اللي إستهلكها الأشخاص دول أثناء المشي بالطريقة دي .

.

.

وفي النهاية نتايج التجربَة كانت كالتالي ،

 

- الناس اللي كانت إيدها متثبتة وما بتتحركش بذلوا طاقة أكبر من طاقة المشي بالطريقة العادية بـ مقدار 12%

 

- والناس اللي كانت إيدها بتتحرك بطريقة عكسية بذلوا طاقة أكبر من طاقة المشي العادي بمقدار 26% 

..

وإستنتجوا من التجربة إن حركة الإيد بتقلل من الطاقة اللي بيبذلها الجسم أثناء المشي .

وإن حركة الإيد البسيطة دي بتوفرعلى الإنسان مجهود كبير جدًا .

.

.

.

.

لكن يبقى التساؤل ، يا ترى ليه حركة الإيد بتقلل من الطاقة المبذولة ؟

- و الموضوع بيرجع لعدة أسباب :

 

# السبب الأول هو إن جسمك عِبارة عن جُزئين ،

جزء عُلوي .. وجزئ سفلي .

 

لما رجلك تحت بتبدأ في المشي ، بتحرك الجزء السفلي من جسمك وبتحاول تحرك الجزء العلوي معاها ..

 

حركة إيدك بقى بتساعدها في المُهمة دي .

 

حيثُ إن تأرجح إيدك يمين وشمال بيساعد على دفع الجزء العلوي من جسمك للأمام .

وبيقلل المجهود اللي رجلك بتبذله .

..

يعني من الأخر كده إنت بتمشي بإيدك ورجلك . 😃

.

.

.

 

# السبب التاني بقى ، إنك لما بتاخد خطوة لقدام بأي رجل من رجليك الإتنين الحلوين 😃 دَه بيسبب ما يُسمى بـ (الزخم الزاوي) أو الدوران .

 

يعني لو إنت أخدت خطوة برجلك اليمين ده بيخلي جسمك كله يلف ناحية اليمين .

 

وعشان تخليه مايلفش ، فلازم تعمل حاجة تلاشي الدوران ده .

والحاجة دي هي إنك تحرك إيدك الشمال .. وبالتالي بتعمل إتزان للحركة ..

..

وعشان كده بتلاقي نفسك تلقائيًا وإنت ماشي بتحرك إيدك اليمين مع رجلك الشمال .. وإيدك الشمال مع رجلك اليمين .. مِش العكس .

 

لأن هي دي الطريقة الوحيدة اللي هتعمل لـ جسمك إتزان ، وتخليك ما توقعش على وشك وإنتَ ماشي 😃

.

.

.

يبقى بإختصار كده إنت بتحرك إيدك وإنت ماشي عشان تساعد الجزء العلوي من جسمك إنه يتحرك مع الجزء السفلي ..

 

وعشان تعمل إتزان للدوران اللي بيحصل أثناء المشي .

 

وحركة إيدك دي بتقلل جدًا من الطاقة والمجهود اللي بيبذلهُم جسمك في المشي .

أعجبك المقال , قم بالان بالاشتراك في النشرة البريدية للتوصل بالمزيد

    التعليقات

    عن الناشر

    مقالات حالية

    تقنية

    The first car manufactured throughout history